Matthew 14

Yoni to'abihebabitaiso 'ina 'amasa

(Maki 6:14-29; Luke 9:7-9)

1Tuta nage 'oina Helodi*, tauna Galili 'ana toloina, Yesu 'ina paihowa wasana 'ihesagoheya, 2ta 'ina topaihowao 'ihegwaediya, 'igwae, “Beno loheyaina tauna Yoni to'abihebabitaiso, 'abehega 'amasega 'itoholo hila pwaiya, ma 'oinega ma'ina waiwai 'ipaipaihowa.”

3Weyahina mwalo Helodi Yoni 'i'abiyahiya, ma 'ipaiya, ma deliya 'ilaguya. Ma Yoni 'ana 'abiyahina huhuna beno 'aigeda wahine sanina Helodiyasa, beno Helodi tasina Pilipi mwanena, 4ma Helodi 'i'wayeya ta 'ihaiya, ma Yoni Helodi 'ihegwaeya 'igwae, “Nage geya mumuga 'ausalana, weyahina tasiu mwanena 'uhaiya.” 5Beno huhuna Helodi nuwanuwana ma Yoni 'ilohe'amasi, ma hesi tomota mabwaiyadi si'ahwa palopitaeya, 'oinega Helodi 'imatauta ma geya Yoni 'ilohe'amasi.

6Muliyetega Helodi 'ina sabwelo li'u 'ana 'ebe nuwatuhu yahina guyaina 'oina boda si'autama, ma Helodiyasa natuna wahinena boda matadiya 'isobusobu, ma Helodi 'i'abihe yaliyayeya. 7Ma Helodi gumalaulauina 'oina 'igwae helauwa ma 'abehega 'eguma to'aha nuwanuwana 'i'ebwae tuwa, ma wete 'igwae hemisa. 8Coinega sinana 'igwae gumalaulauina 'oina, ma gumalaulauina Helodi 'ihegwaeya, 'igwae, “Nuwanuwagu Yoni to'abihebabitaiso mwaguna gaeba 'oina 'ulagu ma 'u'ebwaegau.”

9Coinega Helodi 'inuwagala madouna, ma hesi 'ina gwae hemisa 'inuwatuhu yahiya, ta boda 'ina hegwaegwae sihesagoha pwaiya, 'oinega 'itagwala, 10ta 'ina topaihowao deliya 'ihesumanediya, ma Yoni tani'ona si'upweya, 11ma mwaguna gaeba 'oina sido'oya ta si'eweyama, ta gumalaulau si'ebwaeya. Ma gumalaulauina 'i'eweya, 'itauyeya sinana 'oina. 12Ma Yoni 'ana tomuliyao sinaoma, ta Yoni wahina si'eweya, ta silaguya galiha, ma muliyetega sitauya Yesu 'oina, ta ginaula bewa sihepwaileya.

Boda madouna Yesu 'ihe'aidiya

(Maki 6:30-44; Luke 9:10-17; Yoni 6:1-14)

13Ta Yesu tetelaina bewa 'ihesagohediya, 'oinega 'ilatuwa ta wagai 'igeluwa, 'itauya tupwa yoho 'awawa. Ma boda Yesu tetelina sihesagoheya, ta 'idi 'asa 'oidiyega silatuwa, ma 'edega sitauya Yesu 'oina.

14Ma tutaina Yesu wagega 'iulasuluwa 'oya'oya boda madouna 'i'itediya, ta 'ina 'atemuyemuyega tolohalao 'i'abihe bwebwe'anediya.

15Ma lahilahiya 'ana tomuliyao sinaoma ta Yesu sihegwaeya, sigwae, “Bada, tupwa bewa balabala 'awawa, ma nata 'iboi. Coinega boda bewa 'uhesumanedi ma sihila, ma 'adi sigimwane 'asa deidiya 'oidiya.”

16Ta Yesu 'igwaeya, “Sahena sitautauya, ma 'omi hesi 'e'ahai wa'ebwaedi ma si'ai.”

17Ma taudi sigwae, “Ya! Cama geya baibaiwana, beno namo beledi nima 'ai'aigeda ma silahana 'eluwa.”

18Ta Yesu 'igwaeya, “Beledi ma silahanaedi wa'ebwaegau.”

19Coinega boda 'iloinaediya ma modumoduwa simiyatoiya, ma beledi nima 'ai'aigeda ta silahana 'eluwa 'i'ewediya, ma 'i'ita haneya galewa, ta 'e'ahaiyedi weyahidi 'igwae helauwa, ma muliyetega beledi 'igimwahisiya, ta 'ana tomuliyao 'i'ebwaediya, ma taudi tomota 'oidiya siheguyaiya. 20Ma mabwaiyadi si'aiya ta simwausuwa, ma 'e'ahai tupwatupwadi sidomwa 'autediya, ma kodo tuwelo silohemahediya. 21To'aiyedi loheloheya daisidimo 'adi baibaiwa paibi tausani gide, ta wete wahiwahine ma gwagwama geya sihasilidi.

Yesu hola debanega 'itauya

(Maki 6:45-52; Yoni 6:15-21)

22Coinega 'ana tomuliyaowedi 'iloinaediya, ma wagai sigeluwa ma 'abehega sinugeta hali tupwa, ma tauna 'abehega tomota mabwaiyadi 'ihegwaedi ma sihila 'idi 'asa. 23Sigeluwa, ma Yesu boda 'ihewasaediya, ta muliyetega tauna 'iboinamo 'oyai 'ihaneya sabi 'ahwanoi Yehoba 'oina, ma 'iboiya. Ciboi pwaiya, ma Yesu 'iboinamo 'imiyamiya.

24Cimiyamiya ta tomuliyaowedi 'idi waga siwoseyeya ta sidobi pwaiya ni'uwa, ma bagodu madouna silobeya ma 'idi waga 'ilolobuibui, ta wete yaumai matadiyega 'inaonaoma.

25Gona 'ada'adaleya Yesu hola tabwanega 'itautauyama, ma 'ana tomuliyaowedi deidiya 'ilatuwa. 26Cana tomuliyaowedi Yesu si'iteya hola pwatanega 'inaonaoma, ta simatauta madouna, 'oinega si'alabwauwa, 'idi nuwatuhu 'abehega welabana si'iteya.

27Ma Yesu 'ihegwaediya, “Sahena wamatauta. Taugu tuwa, 'imi Cinapwana.”

28Ma Pita 'igwaeya, “Bada, 'eguma 'owa, 'uhegwaegau ma hola pwatanega yanaowa 'oiuwa.”

29Ma Yesu 'igwae, “Cunaoma.” Coinega Pita wagega 'isuluwa ma hola pwatanega 'itauya Yesu 'oina. 30Citautauya ma yaumai madouna 'i'iteya, ma 'imatauta, ta holai 'idamana, ma 'ibwauwa, “Bada 'u'abihetegau!” 31Ma Yesu 'ilomwayamwayauwa ma Pita 'i'abiyahiya, ta 'igwae, “Tohemisa 'i'iuu, to'aha weyahina 'uhenuwanaluwa?” 32Coinega siteluwa wagai sigeluwa, ma yaumai 'i'ata.

33Ma taudi waga 'ana tomiyao si'etuluha Yesu 'oina, ma sigwae, “Moisa tuwa 'owa Yehoba Natuna.”

Tolohalao 'i'abihe bwebwe'anediya tupwa Genesaleta 'oina

(Maki 6:55-56)

34Eema sihabala tupwa Genesaleta 'oina ma sisuluwa 'oya'oya. 35Sisuluwa ma tupwaina 'ana tomiyao Yesu si'inaneya, ta wasa sihedabalaleya 'idi 'asa mabwaiyana 'oidiya, ma 'idi tolohalao mabwaiyadi si'ewedima Yesu 'oina, 36ta si'ahwanoiyeya, sigwae, “Bada, sawasawahina ma tolohalaowedi 'a 'ale'o papalina si'abitoho?” Ta Yesu 'itagwala, ma taudi 'ana 'ale'o si'abitohoya sibwebwe'ana.